Il libri al ricuei un mac di corâi, de tradizion catoliche e di chê luterane, un grum adats pe preiere liturgjiche, sedi pe celebrazion de Messe, sedi par altris moments di preiere.
Al è stât publicât di fresc un imprest impuartant pal cjant liturgjic in lenghe furlane: 50 corâi de cristianitât todescje voltâts par furlan (ed. Glesie Furlane, 2017).
In gracie de fadie dai tre curadôrs, pre Josef Cjargnel, pre Roman Michelotti e Gabriel Zanello, il libri al ricuei un mac di corâi, de tradizion catoliche e di chê luterane, un grum adats pe preiere liturgjiche, sedi pe celebrazion de Messe, sedi par altris moments di preiere.
Di agns, sedi par furlan che par talian, tes nestris celebrazions si cjantin corâi di riunde todescje, ch’a palesin la vene religjose di chê clime culturâl. Pensìn dome a Großer Gott (Al Agnel sacrificât, Te lodiamo, Trinità) e Lobe den Herren (Laude il Signôr dal mont, Lodate Dio) par vê indiment dome i titui plui innomenâts. Cheste vore e slargje l’ufierte e la propueste permetint di sielzi i tocs plui adats tes ocasions liturgjichis.
Di chescj cjants si à di racomandâ prin di dut, il fondament biblic dai tescj. Lis composizions, difat, a revochin dute la fuarce evocative e invocative dai salms, l’intensitât des suplichis dai juscj di Israel, l’ispirazion religjose che e fodre lis cjantis al Altissim vignudis fûr dal cûr ricognossint dai oms e des feminis di Diu de Scriture. Un altri aspiet di rimarcâ al è chel de coralitât e duncje si trate di composizions nassudis prin di dut pe samblee, ancje se a van ben di scoltâ tune suaze contemplative.
A 500 agns de Riforme luterane e cul gnûf snait ecumenic, tornât a inviâsi in gracie di pape Francesc, cheste e jè une buine ocasion par urî a une fontane spirtuâl significative tignint cont che la cristianitât todescje prin di cumò e à metût in comunion i cjants fra la component catoliche e chê luterane. Tant plui che il Friûl al à di secui contats cul mont todesc par tantis resons.
Une ultime peraule su la lenghe. I tocs di cheste racuelte a son metûts jù cun grande competence lenghistiche, sielzint cun sapience peraulis e costruzions tipichis dal furlan cence colâ te vuate de imitazion dal talian salacor cun risultât puars e banâi. Une prove che il furlan al pues jessi doprât tun nivel alt e dignitôs, par dî dute la passion dal om ch’al gjolt e ch’al vai e insiemi la sô fede tal Onipotent ch’al perdone, al vuarìs, al dà la vite e ancje le cjol.
